【張晨】《「你咪係我個小玉同學囉…」，但到咗今日，呢位 小玉同學 又去咗邊度呢？》

內容由博客提供及授權轉載，不代表本刊立場

如果你曾經覺得自己係小丸子，咁你都會墮入一種幻想，
將身邊人設定成不同角色。
野口、大野、花輪、丸尾同學等等等等……

咁當時嘅 小玉同學 又係邊個呢？

最親近，最肯為你付出嗰個就係 小玉同學 。

你曾經都將佢代入小玉嗰樣，
望住佢傻笑咗一下。

但你發現，呢個小玉同學嘅角色原來不斷轉變。
隨住暑假後、畢業後、上班後、離職後……

冇一個 小玉同學 ，可以共行到尾。
好多人，包括你自己，都喺人生路上不斷重複一件事 － 「分道揚鑣」。

我成日都諗，點解大部分兒童動漫嘅主角，永遠唔會長大，
小新除咗啲外傳故事，永遠讀緊幼稚園、大雄都總係小學生。

或者作者都知道成長就伴隨變化，
而變化總帶嚟遺憾。

廿年後嘅小新再冇同風間聯絡；三十年後嘅大雄同技安形同陌路。

小學嘅 小玉同學 ；同中學嘅 小玉同學 ，根本已經轉了人。

當年嘅 小玉同學 ，
由無所不談，到「今日天氣唔錯」，係感情上最傷感嘅變遷。

但再諗深一層，雖然同佢中間走入咗唔同隧道，
不過人生路上數十年，總有啲目的地，你哋會再相遇。

而且你發現，雙方好少再傾閒偈，只係一去到啲「大事」，雙方都係義不容辭。

小玉同學 即使唔再同班，但心入面重視你嘅火花，卻還未燒盡。