港姐亞軍鄧卓殷情牽郭子豪5年 難忘韓國真人騷經歷生死 終郵輪浪漫求婚
2018年港姐亞軍鄧卓殷Amber與圈內男友郭子豪Arnold拍拖5年，今年年頭在日本郵輪被浪漫求婚，甜蜜滿瀉！Amber和Arnold身高相差23cm，常以「最萌身高差情侶」為題拍攝搞笑日常，但原來搞笑背後，他們也度過細膩浪漫、甚至驚險萬分的時間！
初相識認定男方是「怪人」
模特兒出身的Arnold身高185cm，外表高大俊朗，內裡卻搞笑又趣怪！Amber直指對他第一印象就是「奇怪」！「嗰陣我啱啱入行，大家一齊去個活動，突然有個男仔衝入嚟我哋休息室，無啦啦喺成班女仔面前換衫，我就覺得佢好奇怪！」Amber對第一次見面仍歷歷在目，Arnold在旁解釋因為模特兒工作常要求快速換不同造型，所以當時想也沒想就在休息室換衫。
後來兩人因工作關係慢慢了解，怎料第一次正式約會時，Arnold居然不gel頭不打扮，很「頹」地跟Amber去街，連Amber也忍不住說：「啱啱識佢真係好奇怪！」Arnold這時卻沾沾自喜道：「呢個係我個策略！因為一對情侶無可能24小時都化妝，我想畀佢睇到最真實嘅自己。」
除了第一次見面的「不打扮策略」，Amber和Arnold也花很多時間了解真實的對方，他們愛邊走邊聊天，行山、坐船看日落，在醉人景色中傾心事：「我哋好鍾意天星小輪，因為坐船睇日落好relax。」喜愛香港舊情懷的他們，早前不但在九龍城舊式糖水鋪拍攝婚照，最近Pandora推出香港本土情懷珠寶系列，他們也對其天星小輪和香港夜景串飾愛不釋手，彷彿紀念拍拖的點點滴滴。
難忘韓國真人騷經歷生死
Arnold性格搞怪，但對Amber卻非常體貼，兩人曾參加韓國情侶真人騷節目，24小時拍攝以外，還要面臨寒冷和體能挑戰，Arnold甚至形容過程猶如「經歷生死」，每過一關情侶們都會抱著痛哭！Amber最深刻的一個體能比賽，就是要求四個男生爭奪一個車軚，誰先搶到並帶到自己伴侶身邊，另一半就能獲得休息的機會。
「當時情況真係好激烈，4個男仔搏晒命爭車軚，1分鐘內有人斷咗韌帶要即刻入院，Arnold都差啲整傷『菠蘿蓋』，我見到佢咁辛苦將個車軚帶俾我，就係為咗俾我有休息嘅機會，我又心痛又感動，而呢個亦係大家5年來最難忘嘅回憶之一。」
籌備半年的驚喜求婚
另一個難忘的回憶當然是轟動全城的郵輪求婚！Amber和Arnold整天黏在一起，但Arnold居然可以瞞住女友半年，聯同雙方親友籌備盛大浪漫的求婚，最後在日本郵輪上公開愛的宣言，令Amber驚喜兼感動落淚，網民都大讚Arnold是超有心思的100分男友（未來丈夫）！
Amber和Arnold獲得大眾祝福，他們陸續曬出甜蜜婚照，並透露打算在香港舉行婚禮，邀請家人親友見證他們的愛情！
